ILOILO CITY – Nagalaum ang Department of Education Region VI nga hatagan sang dako nga importansya ni Presidente Ferdinand Marcos, Jr. ang sektor sang edukasyon sa iya ikaduha nga State of the Nation Address sa Lunes, Hulyo 24.
Sa interview sang Bombo Radyo kay Mr. Hernani Escullar, Jr., spokesperson sang Department of Education Region VI, iya ginpahayag nga nagalaum sila nga mas madamo pa nga bulig, proyekto kag programa ang mahatag sang national government sa education system sang pungsod.
Subong lamang nga tuig, ginlunsyar sang Department of Education ang ila bag-o nga agenda nga MATATAG: Bansang Makabata, Batang Makabansa.
Ini ang ginalauman nga makabulig sang dako sa mga estudyante kag mapasiguro ang de-kalidad nga edukasyon.
Makahatag man ini sang nagaka-igo nga bulig sa mga manunudlo.
Sa pihak sang mga pagtilaw sa sektor sang edukasyon, ginpahayag ni Escullar nga natigayon nga mapatuman ang full in-person classes sang nagligad nga tuig.
