ILOILO CITY – Liwat nga nagpahanumdom ang Department of Education (DEPED) sa mga eskwelahan nga likawan ang electioneering ukon anuman nga partisan political activities sa mga graduation kag moving-up ceremonies para sa School Year 2024-2025.
Sa interview sang Bombo Radyo kay Mr. Hernani Escullar Jr., Information Officer sang DEPED Region 6, iya ginpahayag nga nagpagwa si Education Secretary Sonny Angara sang Department Memorandum No. 27 series of 2025.
Suno kay Escullar, nasaad sa Memorandum ni Angara nga ginadumilian ang mga opisyal, manunudlo kag tiglawas sang DEPED nga mag-upod sa anuman nga aktibidad nga may kaangtanan sa politika.
Lakip sa mga ini ang Department Order No. 48 series of 2018 nga nagadumili sa electioneering kag partisan political activity kag Department Order No. 47 series of 2022 ukon ang Promotion sang Professionalism sa Implementation kag Delivery sang Basic Education Programs kag Services kag mga amendments pinaagi sa Department Order No. 49 series of 2022.
Natalana ang End-of-School-Year rites sa Abril 14-15 para sa Kindergarten, Grade 6, Grade 10, Grade 12, kag Alternative Learning System (ALS) learners.
Samtang, ginadumilian man ang pagpangkolekta sang anuman nga kontribusyon ukon balayran sa mga estudyanye para sa nasambit nga seremonya.
Ang tanan nga mga gasto ang dapat maghalin sa school maintenance and other operating expenses (MOOE).
Agud masigurado naman ang safety kag comfort sang mga estudyante kag manunudlo, ginpanugyanan ang mga eskwelahan nga patigayunon ang programa sa mga indoor nga lugar nga may nagakaigo nga ventilation ukon covered courts.
-with a report from Bombo Lynd-C Joy Bade
