ILOILO – Magasugod na ang deployment sang mga kapulisan subong nga adlaw bilang kabahin man sang pagpanghanda sa hiwaton nga Dinagyang Festival 2020.
Sa interview sang Bombo Radyo kay Pol Col Martin Defensor Jr., direktor sang Iloilo City Police Office iya ginpahayag nga mas ginpa temprano niya ang pagpa deploy sa mga kapulisan bangud man sa pila ka mga security concerns sa syudad.
Suno kay Defensor, kun mas temprano ang pagdeploy sa mga kapulisan mas mangin kampante sila nga magapabilin nga malinong ang paghiwat sang nasambit nga kahiwatan.
Dugang sang natungdan, 2,100 sa mga gindeploy nga kapulisan ang nagikan sa Regional head quarters lakip man ang plus force multipliers.
Samtang wala naman sang kuhaon sa mga police stations sa mga distrito sa syudad kag magapabilin ang sinuman nga naka duty sa mismo nga adlaw sang kahiwatan.
Santo sa pahayag ni Defensor, pagatutukan sang mga kapulisan ang City Proper kag iban pa nga bahin sang Senator Benigno Aquino Jr. Avenue, Mandurriao sa diin patigayunon ang pila ka mga kahiwatan may kaangtanan sa Dinagyang nga sigurado dugukon sang madamo nga tawo.
Nagpasalig naman ang Iloilo City Police Office nga may yara sa gihapon nga ideploy nga mga personnel sa iban nga distrito kag ginasiguro nila ang kalinong kag katawhay sa bilog nga syudad kadungan sang pagpatigayon sang Dinagyang Festival subong nga tuig.
