ILOILO CITY – Nagsugod na ang deployment sang mga balota para sa local government unit.
Halin sa warehouse sa Pasig City, ginkarga sa mga container van ang linibo ka mga balota sang Commission of Elections (COMELEC) agud nga dal-on sa nagkalain-lian nga LGU sa pungsod.
Masobra sa 65 million nga balota ang ginapahayag nga dal-on sa mga syudad kag banwa sa bilog nga pungsod.
Karon sa kagab-ihon naman, magabyahe ang pito ka container van nga isakay sa mga barko padulong sa Bangsamoro Autonomous Region in Muslim Mindanao (BARMM) kag Zamboanga Peninsula.
Ini ang una nga batch sang balota nga ipadala sa nagkalain-lain nga lugar sa pungsod nga magadugay tubtob sa Mayo 5.
Ginpasalig naman sang COMELEC ang seguridad sang mga balota bangud may yara sang upod nga pulis kag militar sa loading kag sealing sang balota.
Samtang, nagpasalig man ang Parish Pastoral Council for Responsible Voting (PPCRV) nga magabulig sila sa paghalin sang van padulong sa mga warehouse tubtob nga makalab-ot sa destinasyon.
Suno sa COMELEC, i-deretso ang mga balota sa mga treasurer’s office sang LGU agud didto taguon antes dal-on sa mga presinto sa Mayo 9.
Sa tion nga maabtan sang bagyo ukon maaberiya ang barko, may yara na sang contingency plan nga ginpreparar ang COMELEC.
Sumugod subong nga adlaw, adlaw-adlaw naman ang pag-dispatch sang balota sa nagkalain-lain nga rehiyon sa pungsod.
