ILOILO CITY – Nakahanda na ang deployment plan sang mga personnel sang City Environment and Natural Resources Office may kaangtanan sa nagahilapit nga Dinagyang Festival 2020.
Sa interview sang Bombo Radyo kay Engr. Neil Ravena, pinuno sang Solid Waste Management sang General Services Office, iya ginpahayag nga napasa na niya sa Iloilo Festivals Foundation Inc. ang deployment plan.
Suno kay Ravena, nagalab-ot sa 96 ka street sweepers, 10 ka garbage monitors and collectors kag 20 ka garbage truck ang iga-deploy.
Ginpahayag ni Ravena nga ginalauman nga magalab-ot sa 60 tubtub 80 ka tonelada nga basura ang matipon sa duha ka adlaw nga Dinagyang highlights.
May kaangtanan diri, ginpahayag naman ni Iloilo City Mayor Jerry Treñas nga ginahulat na lang nga matigayon ang pagbakal sang garbage bin nga igapahamtang sa palibot sang syudad.
Suno kay Treñas, bangud nga wala pa nakabakal sang garbage bin, may ipahamtang anay nga mga kaing agud nga may yara sang habuyan sang basura ilabi na kun may yara sang ginapatigayon nga aktibidad.
Wala naman napunggan ni Treñas nga magpabutyag sang pagkadismaya pagkatapos ang ginpatigayon nga Opening Salvo bangud nga madamu ang basura nga naglinapta sa mga dalan.
Kun tani suno sa alkalde, mangin responsable ang tanan sa paghaboy sang basura agud nga indi maghigko ang palibot.
