ILOILO – Nagahingyo ang Sangguniang Panlalawigan ng Iloilo sa Department of Health kag sa sa National Inter-Agency Taskforce nga punggan ang deployment sang anum ka Doctors to the Barrios sang Iloilo padulong sa Cebu City.
Sa interview sang Bombo Radyo kay Iloilo Fourth District Board Member Domingo Oso Jr., iya ginpahayag nga ginakinahanglan man sang Western Visayas ang bulig sang kaugalingon nga mga doktor ilabi na bangud nagataas man ang kaso sang coronavirus disease 2019 (COVID-19) sa probinsya sang Iloilo.
Suno kay Oso, indi lang COVID-19 ang ginahatagan sang pagtamod sa probinsya kundi lakip man ang dengue kag iban pa nga balatian kadungan sang pag-umpisa sang tig-ululan.
Una diri, nakapadala man sang Joint Position Paper ang nasambit nga anum ka mga doktor sa Sangguniang Panlalawigan kun sa diin ila ginhingyo nga buligan sila nga magpabilin lang sa ila assignment sa Iloilo.
Sa amo nga position paper nga ginpadala sang Hunyo 28, nakasaad nga wala napahibalo sang maayo ang mga doctor nga iga-deploy bangud wala sang written document, wala sang opisyal nga konsultasyon nga ginhimo antes ginpagwa ang direktiba, wala ginpatpat ang guidelines and protocols kun paano maprotektahan ang mga doktor sa ila temporary assignment, kag ang mandu ang ginapahayag nga paglapas sa Doctors to the Barrios Program.
