Ginpatpat sang isa ka dermatologist ang mga rason kun ngaa naga-angkon sang miliaria ukon mas kilala bilang “bungang araw” ang isa ka tawo, ilabi na subong nga tuman kainit sang tyempo.
Sa interview sang Bombo Radyo kay Dr. Aizlyn Robledo, isa ka dermatologist, iya ginpahayag nga ang miliaria amo ang pagpaguwa sang magagmay nga butlig-butlig sa panit.
Ini nagakatabo bangod sa mainit nga tyempo kag sobra nga balhas, nga nagabunga sang pagbara sang sweat glands sa panit.
Suno pa sa iya, kun ang isa ka tawo may miliaria nagakabatayag ini sang kakatol kag kahapdi.
Nagpanugyan si Dr. Robledo nga importante gid nga magtinir sa mabugnaw nga lugar agud malikawan ang sobra nga pagbalhas.
Nagrekomendar man ini sa pagsuksok sang cotton kag lightweight nga mga bayo agud makaginhawa sang maayo ang panit.
Dugang pa sini nga importante permi ang pagpaligo bangod makabulig ini sa pagpanubo sang temperatura sang lawas kag malikawan ang pagbara sang pores.
Nagpahanumdom man ini nga importante man ang pagpakonsulta sa dermatologist kag indi na maghulat nga maglala pa ang Miliaria bangud mas maayo nga matatapan ini sang mga eksperto nga nakahibalo sang dapat himuon kun may ara sang Miliaria sa panit.
