Ginpatpat sang isa ka dermatologist ang mga rason kun ngaa nagakatubuan sang uyapos ang panit sang isa ka tawo kag kun paano ini bulngon inkaso nga magtubo na sa panit sang isa ka tawo.
Sa interview sang Bombo Radyo kay Dr. Cecilia May Uy Tan, iya ginpahayag nga ang uyapos resulta sang bacterial infection nga masami nagatubo sa parte sang lawas kaangay sang ilok, tiil, kag iban pa nga mabuhok nga parte sang panit.
Suno sa iya, mas mataas ang posibilidad nga matubuan sang uyapos ang isa ka tawo kon manubo ang iya resistensya.
Nagbilin man ini sang panugyan nga importante gid nga maprotektahan ang immune system paagi sa maayo nga hygiene kag pagkaon sang masustansya nga pagkaon.
Gin-athag man sini nga indi paagi sa transmission ukon direkta nga skin-to-skin contact ang rason kun ngaa nagakatubuan ang isa ka tawo sang uyapos bangud ang iban nga rason amo nga naghalin ini anay sa hair follicle nga nagaka-inflame kag nagaapekto sa nagapalibot nga tissue antes magguwa ang uyapos.
Pahayag pa ni Dr Tan nga mahimo nga mag-ayo ang uyapos sa sulod sang isa ka semana kon insakto ang pag-atipan mo sini agud mag-ayo.
Nagpanawagan man ini sa publiko si nga magpakonsulta gilayon sa mga doktor kag indi na paghulaton nga maglala pa ang kondisyon antes magpangayo sang bulig halin sa eksperto.
