Nagpaandam ang isa ka dermatologist batok sa mga balatian ukon kondisyon sa panit nga mahimo makuha gikan sa tuman nga exposure sa init sang adlaw.
Sa interview sang Bombo Radyo kay Dr. Haider Reyes, iya ginpahayag nga isa sa pinaka-komon diri amo ang bungang- balhas ukon prickly heat.
Suno kay Dr. Reyes, kalabanan nga ginatubuan sini amo ang mga lapsag.
Paathag sang doctor, ang balhas ang nagabyahe paagi sa gagmay nga sweat ducts nga ginadala ini sa ibabaw sang panit kag kun ang mga duct ang mangin barado bangud sa tuman nga balhas, ini ang magatinir sa idalom sang panit nga magaresulta sa pagtuhaw sang itchy red bumps.
Ini ang mahimo maglutaw sa bisan diin nga parte sang lawas apang masami ini nga makita sa mga lugar nga ginabalhasan kaangay sang ilok.
Pila sa mga remedyo diri amo ang pagbutang sang cold compress agud mabugnawan, indi ini pagkaluton kag likawan ang paggamit sang maisog nga skin products.
Mas maayo man nga magpakonsulta gilayon sa espesyalista sa panit agud gilayon nga mabulong.
