ILOILO CITY – “It is not an ill advise. It is very, very, very, very, very ill.”
Ini ang reaksyon ni Iloilo City Mayor Jerry Treñas sa desisyon sang Department of Health (DOH) nga pag-ilis kay DOH Region 6 director Dr. Marlyn Convocar bilang overseer sa mga lihok sang bilog nga Western Visayas batok sa coronavirus disease 2019 (COVID-19) outbreak.
Ang amo nga posisyon ang gindesignar kay DOH Central Visayas Director Jaime Bernadas.
Si Convocar naman ang magadumala na lang sang mga regular nga operasyon sang DOH-6.
Sa interview sang Bombo Radyo kay Treñas, iya ginpahayag nga indi maayo nga islan ukon kakason ang sin-o man nga tinawo sa patag-awayan sa tion sang isa ka outbreak.
“It is not very good that you will change your field commanders in a middle of a fight,” pahayag sang alkalde.
Suno kay Treñas, makapila naman ka bes nga ‘nag-away’ sila ni Convocar bangud sang ‘indi pag-intindihanay’ sa mga mandu sang DOH-6 sa mga Local Government Units (LGUs).
Matandaan nga sa interview sang Bombo Radyo kay Treñas sang Mierkules, Abril 1, nagpahayag man siya sang pagkadismaya sa national government agencies bangud sang pila ka mga instruksyon nga ‘wala naga-alalangot’, sa diin sa iya mensahe sa DOH-6, iya ginpahayag: “Ano gid bala ang gusto n’yo? Kay kun ako ang palantawon sa subong, daw wala na ini sang direksyon.”
Aminado si Treñas sa sini nga mga reklamo apang dugang niya, “Ako ya, I believe, nga sa isa ka environment, especially sa isa ka high-stressed environment, there will be times that you will be fighting each other, but what’s important is that we are all working for the good of Iloilo City.”
Pahayag sang natungdan, bangud gin-islan si Convocar, kinahanglan na naman nga maghulat bangud magasugod si Bernadas sa ugat sa problema kag mag-isa-isa sa mga LGUs kag mga plano.
“I don’t know why all of these happened. I am not the director of DOH,”pahayag ni Treñas.
Nahibaluan nga ang pagdesignar kay Bernadas bilang overseer sa Western Visayas ang ginmandu ni DOH Undersecretary Adbullah B. Dumama Jr. sang Abril 2, Hwebes.
Ini matapos ang kontrobersiya nga ginpangatubang ni Convocar sang iya gin-mandu nga kabigon bilang Persons Under Monitoring (PUMs) ang tanan nga pumuluyo sa Guimbal, Iloilo matapos nga makumpirmar ang local transmission sang COVID-19 sa lugar.
