Ginahulat gihapon ang mangin desisyon sang FIBA para sa naturalized player sang Gilas Pilipinas nga si Justin Brownlee samtang amat-amat naman nga nagasako ang national team para sa preparasyon sa 2025 FIBA Asia Cup Qualifiers nga magasugod na sa Pebrero.
Suno kay Samahang Basketbol ng Pilipinas President Al Panlilio, nakapasa na si Brownlee sang tanan nga documentation matapos ini nga naglagbong sa anti-doping test sang nagligad nga tuig kasunod sang maragtason nga pagkampyon sang Pilipinas sa Asian Games sa China.
Matandaan nga nakit-an sa test nga positibo ang 35-anyos nga basketball star sa carboxy-THC, isa ka substance nga naangot sa paggamit sang cannabis nga ginadumilian sa idalom sang World Anti-Doping Agency.
Ginpahayag man ni Panlilio nga maayo ang nangin desisyon ni Brownlee nga indi anay maghampang para sa Barangay Ginebra sa nagapadayon nga PBA Season 48 Commissioner’s Cup.
Nagalaum si Panlilio nga mangin paborable para sa Gilas star ang desisyon sang FIBA.
Si Brownlee amo ang nagpanguna sa national team nga mabalik sa Pilipinas ang trono sa men’s basketball sa Asian Games matapos ang 61 ka tuig. Siya man ang nanguna nga maagaw liwat sang Pilipinas ang kampyonato sa SEA Games matapos nga nagsal-ot ang Indonesia sa winning streak sang pungsod sang nagligad nga edisyon.
Sa subong, kinahanglan pa nga magporma liwat sang team ang Gilas kasunod sang kadalag-an sa Asiad.
Kuwalipikado ang Pilipinas sa FIBA Asia Cup qualifier para sa 2025 kun sa diin makasumpong sini sa Group B ang New Zealand, Chinese Taipei, kag ang Hong Kong. Balantayan ang qualifiers sa Pebrero 2024, Nobyembre 2024 kag Pebrero 2025 sa home-and-away format.
May Qualifying Tournaments man para sa Paris Olympics kun sa diin makasambuwa sang Gilas ang Georgia kag Latvia sa Hulyo.#
(FIBA)
