ILOILO CITY- Ginapanan-aw sang isa ka political analyst ang posibilidad sang destabilization scenario batok sa administrasyon ni Ferdinand BongBong Marcos Jr. sa tion nga makapungko na ini bilang presidente.
Sa interview sang Bombo Radyo kay Atty. Joenar Pueblo, isa ka Bombo Abugado, iya ginpahayag nga apisar napang-dismiss na ang tanan nga disqualification cases batok kay Marcos, posible nga masundan ini sang mga attempts agud mapahalin siya sa pwesto.
Suno kay Pueblo, isa ka posibilidad amo ang pagduso kay Sara Duterte Carpio nga maagaw ang pinakamataas nga posisyon sa pungsod kun makapungko na ini bilang Vice-President.
Pahayag ni Pueblo, kun lantawon, mayorya sa mga nagdalaog nga senador, apisar nga yara ang mga ini sa idalom sang slate ni Marcos, apang mas madalom ang ila relasyon kay Presidente Rodrigo Duterte nga amay ni Sara.
Paathag niya, bangud sini, mahimo ini mangin konsiderasyon agud nga iduso sang mga loyalista ni Presidente Duterte nga makabulos bilang presidente ang isa pa gid ka Duterte.
Nagalaum naman si Pueblo nga indi matabo ini nga mga scenario sa palaabuton.
Nagpanawagan naman ini sa publiko nga kun mahimo, respetuhon ang desisyon sang masobra 30 million nga mga Filipino nga i-elihir ang isa ka Marcos bilang masunod nga presidente.
