ILOILO CITY – Nagpasalig ang Cebu Landmasters nga mabakud ang ginapatindog nga condominium building sa Arroyo St, Iloilo City Proper.
Ini ang kasunod sang kahangawa sang publiko matapos nga makapila ka beses nga nag-usmod ang bahin sang dalan sa kilid sang ginapatindog nga building.
Sa interview sang Bombo Radyo kay Mayor Jerry Treñas, iya ginpahayag nga sa ginpatigayon nga pagsinapol, nagpasalig ang developer nga indi matumba ang 33 ka panalgan nga Terranza Residences.
Suno sa alkalde, ginpahibalo niya ang amo nga developer nga nagadihon sang ordinansa ang syudad nga naga-require sa ila nga panami-on ang drainage system sa palibot sang proyekto bilang pagpahanda sa outflow nga halin sa building.
Pahayag sang alkalde, nagpromisa ang developer nga nakahanda sila nga magsunod sa ordinansa sa tion nga mapasar na.
Ang ini nga ordinansa suno sa alkalde ang magaserbe nga pagpanghanda lamang sa tion nga mag-ulan.
BUILT USING THE LATEST CONSTRUCTION STANDARDS
Suno naman kay Jess Kabigting, Vice President for Operations sang Cebu Landmasters, iya ginpahayag nga ang building ang gintukod base sa latest construction standards.
Ang 33 ka panalgan nga Terranza Residences amo ang mangin pinakamataas nga building sa downtown area sang Iloilo City.
ISOLATED CASE LAMANG
May kaangtanan naman sa pag-usmod sang bahin sang dalan sa kilid sang project, ginpahayag ni Jun Capistrano, Vice President for Engineering sang GGTT Realty Corporation nga partner sang Cebu Landmasters kag International Builders Corporation sa pag-develop sang building, nga gilayon nga ginkay-o ang guba sang adlaw mismo.
Suno sa iya, mahimo nga tuga lang sang pag-ulan dala sang Low Pressure Area ang pag-usmod sang duta.
Apang, wala man sang paghulag sa steel sheet piles sa mismo nga building.
Pahayag niya dugang, isolated case lamang ang natabo.
