Kun ano ka “kalmado” ang general situation sa syudad sang Kabul sa Afghanistan umpisa sang pag-take over sang pwersa sang Taliban sang Domingo, amo man sini kagamo ang sitwasyon sa airport.
Mismo ang NATO kag isa ka Taliban official ang nagkumpirma nga 12 na ka tawo ang napatay sa airport halin sang adlaw sang Domingo — posible bangud sa igu sang pusil ukon sa stampede bangud sang desperado nga pagdali nga maka-gwa sa Afghan capital.
Kasunod sini, naghingyo ang Taliban sa publiko nga magtinir na lang sa ila nga balay bangud indi luyag sang militante nga grupo nga may mapatay ukon may masamaran bangud sang ginamo sa airport nga amo subong ang exit point sang kadam-an.
Isa ang Ilongga nga si Lorena Aurelio sa nakasaksi sa sini nga mga hitabo. Si Aurelio ang nagatrabaho bilang operations manager sa isa ka logistics company sa amo nga pungsod. Isa man siya sa mga luyag na nga makahalin sa Afghanistan kag mabalik lang ugaling kun maayo na ang seguridad.
Sa exclusive interview sang Bombo Radyo kay Aurelio, iya ginpahayag nga isa pa lang ka kilometro halin sa airport, nagapugok na ang trapiko sa amo nga syudad.
“Mayroon kaming naririnig na putok sa daan pero hindi naman malakas. Just a sign para itong mga tawo, tumabi o bumalik dahil ang hirap talaga ng daan,” pahayag ni Aurelio.
Sang ulihi, ginbutangan na lang sang barikada ang palibot sang airport. Apisar may passport, wala nakasulod ang mga Pinoy nga may tuyo man kuntani nga makahalin sa amo nga syudad. Bangud sang risgo, nag-abiso ang Philippine Embassy nga magbalik na lang ang mga Pinoy sa ila nga mga balay.
“We were there for two hours. Pabalik-balik ang mga tao, kaya polluted ang mga daan.”
Apang sa bahin sang Taliban, lain ang obserbasyon ni Aurelio.
“Makikita mo sila sa police cars, tumatawa, nagpapa-picture… as if they are the kind of people na galing sa bundok na naninibago sa city.”
Nahadlok bala ang mga Pinoy sa lupok sang mga pusil? “Alam namin kasi na ang paputok nila, pataas. Maliit na gun lang just to tell the people na bumalik or move back.”
Sa subong suno sa natungdan, nagapabilin anay ang mga Pilipino sa ila nga mga balay, sandig man sa abiso sang embahada, bangud apisar mag-abot man ang eroplano nga magsugat sa ila, pat-od nga dumugon man ini sang mga tawo nga yara sa airport.
Suno sa Philippine Department of Foreign Affairs (DFA), subong nga Hwebes sang hapon, 90 pa ka mga Filipinos ang yara sa Afghanistan.
Duha na ka attempts ang ginhimo sang DFA para sa evacuation via New Delhi, India kag Islamabad, Pakistan, apang lunsay wala natigayon bangud cancelled ang commercial flights.
Ang United States kag iban nga Western powers ang nagapatigayon man sang evacuation sa ila nationals kag iban nga Afghan staff halin sa airport nga amo ang ginalantaw magapasingki pa sang protesta batok sa mga Islamists.##
