Nagpasalig ang Department of Foreign Affairs (DFA) nga hugot ang monitoring sini sa reports nga ginaalegar may mga espiya nga naga-operate sa Pilipinas.
Suno kay DFA spokesperson Ma. Teresita Daza, naga-trabaho ang ahensya kaupod sa iban pa gid nga government agencies agud nga mahisayran ang isyu sa national security.
“The Department has noted reports containing relevant information on alleged foreign covert operations in the Philippines. In accordance with its mandate to help protect national security, the Department takes such reports seriously and is monitoring relevant developments in this regard,” kabahin sang statement.
Ini nga pahayag ang nagguwa pila ka adlaw matapos naistoryahan man sa quad committee sa Kamara ang Chinese spies kun sa diin naangot si dismissed Bamban, Tarlac Mayor Alice Guo.
Nabukaran liwat ang isyu sang ginpresentar ang isa ka documentary sang Al Jazeera nga naga-feature sa self-confessed Chinese spy nga si She Zhijiang nga preso subong sa Thailand.
Gina-alegar sini nga na-recruit siya samtang yari sa Pilipinas. Gintudlo man sini nga isa ka espiya si Guo Hua Ping ukon ang Chinese nga pangalan ni Alice Guo.
Una naman nga ginpahayag sang National Security Council (NSC) nga may yara ini sang “effective counter intelligence efforts” batok sa foreign spies nga nagahulag diri sa pungsod.
