Gin-abisuhan sang Department of Foreign Affairs (DFA) ang mga Pinoy sa Syria nga ipabilin nga bukas ang komunikasyon sa Philippine Embassy sa Damascus matapos nakumpirma nga nagdaog ang mga rebelde kag napahalin na sa pwesto si President Bashar al-Assad.
Sa statement sang ahensya, ginpahayag ang kahangawa sa sitwasyon sang mga Pilipino sa pungsod.
Nagpanawagan man ini sa duha ka mga partido nga likawan ang mga kalakasan para nga wala sang casualties sa mga sibilyan.
“We express concern regarding the situation of our Filipinos in Syria and advise them to take the necessary precautions and stay in contact with the Philippine Embassy in Damascus,” kabahin sang statement.
“The Department of Foreign Affairs continues to monitor, with concern, ongoing developments in Syria,” suno pa sa agency. “The Philippines calls on all concerned parties to exercise restraint and refrain from further violence, to avert further casualties and deaths of civilians.”
Ginsiling man sang ahensya nga padayon ang ila nga pag-monitor sa sitwasyon sa Syria matapos na gindeklarar sang rebelde ang kadalag-an, napatal-as ang presidente, kag nakuha ang control sa Damascus nga amo ang kapital sang pungsod.
Nahibaluan nga base sa record sang DFA, may 743 ka mga Pinoy nga yara sa Syria.
Base sa deklarasyon sang Syrian rebels, gintapos na nila ang 24 ka tuig nga pagginahum ni Assad kag ginapatigayon na nila subong ang mga operasyon batok sa “terrorist groups” sa Hama kag Homs kag sa Deraa.
Sa pihak nga bahin, ginkumpirma naman sang Russian media nga nakaabot na sa Moscow si Assad kag ang iya pamilya matapos nga ginhatagan sang asylum kasunod sang ila pagtal-as sa Syria. Ginpahayag nga gin-base sa humanitarian grounds ang asylum nga ginhatag sa Syrian president.#
