Ginkumpirma sang Department of Foreign Affairs (DFA) nga wala pa sila sang may nabaton nga mando halin sa Supreme Court para kanselahon ang pasaporte ni Anay Ako Bicol Rep. Zaldy Co, nga nagpalagyo pagguwa sa pungsod matapos maulamid sa multi-billion pesos nga kontrobersiya sa flood control projects.
Sa isa ka pahayag, ginsiling sang DFA nga possible lamang sini kanselahon ang pasaporte sang isa ka Pilipino kun nakabaton sang court order halin sa isa ka competent Philippine court,” kasunod sa Sections 4 kag 10 sang Republic Act 11983 ukon New Philippine Passport Act.
Nauna na nga nagpagguwa ang Sandiganbayan sang warrants of arrest batok kay Co kag sa 17 nga iban pa, lakip ang pila ka mga opisyal sang Department of Public Works and Highways (DPWH) kag mga representante sang Sunwest Corporation, private construction firm nga ginapanag-iyahan sang pamilya ni Co kag gin-angot sa kickbacks halin sa flood control projects.
Matandaan nga hugot naman nga ginpanginwala ni Co ang amo nga akusasyon.
Si Co, anay chairman sang House Appropriations Committee sang ika-19 nga Kongreso, ang nagbuya sa pwesto matapos mabuyagyag ang ginapahayag nga lapnagon nga iregularidad sa mga flood control project sang gobyerno.
