Nag-file sang diplomatic protest si Department of Foreign Affairs Sec. Teodoro Locsin Jr batuk sa China may kaangtanan sa ila nga layi nga naga-pahanugot sa coast guard nga tiruhon ang foreign vessels nga makit-an sa ila gina-angkon nga West Philippine Sea.
Suno kay Locsin, pagpamahog ang ginahimo sang China sa mga pungsod.
Ang bag-o nga layi sang China ang naapasar lang sang tinalikdan nga semana kag ginalauman nga magahatag ini sang tensyon indi lamang sa Pilipinas kundi mangin sa Vietnam, Malaysia, Brunei kag Taiwan.
Sa nasambit nga layi, ang mga Chinese coast guard ang ginapahanugutan nga himuon ang tanan nga pamaagi lakip na ang paggamit sang weapons kun ang national sovereignty, sovereign rights, kag jurisdiction ang ginlapas sang foreign organizations ukon indibidwal sa baybayon nga ila gina-angkon.
Pahayag naman ni Presidential Spokesman Atty. Harry Roque, ang paggamit sang pwersa sa idalom ang international law ang hugot nga ginadumilian.
Kinahanglan nga sundon sang China ang mga obligasyon sa idalom sang United Nations Convention on the Law of the Sea.
Nahibaluan nga sang 75th UN General Assembly sang Setyembre 2020, gindeklara ni Presidente Rodrigo Duterte ang arbitral victory sang Pilipinas batuk sa China tuhoy sa gina-agawan nga West Philippine Sea.
Suno sa iya, ang award ang kabahin na sang international law ka santu ini sa United Nations Convention on the Law of the Sea kag sa 2016 ruling sang Permanent Court of Arbitration sa Netherlands.
