Ginakumpirmar pa sang Department of Foreign Affairs (DFA) ang report nga masobra 100 ka mga Pilipino ang gin-aresto sa China.
Ini ang kasunod sang statement ni Ministry of Foreign Affairs of China (MFA) spokesperson Guo Jiakun nga may ginahimo na nga tikang ang Beijing sunod sa layi batok sa masobra 100 Philippine nationals nga iligal nga nagapuyo kag nagatrabaho sa ila pungsod.
Suno naman sa DFA, nakig-angot na sila sa Philippine Embassy kag mga konsulado sang Pilipinas agud mahibaluan ang eksakto nga numero, kahimtangan, kag rason sang pag-aresto.
Ginsiguro sang ahensya nga dapat mahatagan sang due process kag kinahanglanon nga consular assistance ang tanan nga na-detain nga mga Pinoy.
Nanawagan man ang Pilipinas sa mga awtoridad sang China nga siguruhon ang kaayuhan sang mga Pilipino nga gin-detain kag gilayon nga ipahibalo sa mga diplomatic post sang Pilipinas ang ila pag-aresto kag detention.
“We call on Chinese authorities to safeguard the welfare of the arrested Filipinos and to promptly notify our Foreign Service Posts of their arrest and detention, consistent with the Vienna Convention on Consular Relations and the 2013 Philippines-China Consular Agreement,” suno sa DFA.
Suno sa amo nga kasugtanan sang 2013, ang host country kinahanglan nga magpahibalo sa konsulado sang pihak nga pungsod sa sulod sang apat ka adlaw kaangot sa kamatuoran kag mga rason kun ngaa ang isa ka national gin-detain, gin-aresto, ukon ginkuhaan sang kahilwayan sa bisan ano nga paagi.
Buot silingon, kun may Filipino national nga gin-aresto ukon gin-detain sa China, kinahanglan ipahibalo sang mga awtoridad sang China sa Philippine Embassy sa Beijing ukon sa bisan diin sa mga konsulado sang Pilipinas ang sahi ukon detalye sang amo nga pag-aresto ukon pag-detain.
Ginapaabot man nga amo man sini ang himuon sang mga awtoridad sang Pilipinas kun may Chinese national nga gin-aresto sa Pilipinas.
Suno sa DFA, ginakilala sang Pilipinas ang kinamatarong sang China nga ipatuman ang ila immigration laws, pareho man sang pagkilala sang Pilipinas sa kinamatarong sang kada pungsod nga ipatuman ang ila nga mga kasuguan batok sa mga foreign nationals sa sulod sang ila hurisdiksyon.
Sa subong, wala pa naghatag sang detalye ang DFA parte sa pagkakilal-an sang mga Pilipino, kun diin sila gin-detain, kag kun ano ang mga alegasyon batok sa ila.
Wala man ginpatpat sang DFA kun may kaangtanan ang mga pag-aresto sa mga isyu sa West Philippine Sea, seguridad, ukon espionage.
Ginatutukan sang mga opisyal sang Pilipinas sa pag-verify sang impormasyon kag pagsiguro nga maprotektahan ang mga kinamatarong kag kaayuhan sang mga Pilipino nga yara sa kustodiya sang amo nga pungsod.
