Ginpanindugan ni Foreign Affairs Secretary Enrique Manalo nga wala sang kahilabtanan ang Pilipinas sa anuman nga indi paghangpanay sang mga gamhanan nga mga nasyon.
Kasunod ini sang nangin akusasyon ni Chinese Foreign Minister Wang Yi nga ginaguba sang Pilipinas ang imahe sang China kag nagasunod lamang sa isa ka ‘screenplay’ sang external forces.
Ginsiling man ni Wang sa press conference sang Byernes nga ang kada aktwasyon sang Pilipinas sa West Philippine Sea, gina-livestream ini sa Western media sa tuyo nga higkuan ang pangalan sang Beijing.
Nagpaandam man si Wang nga maga-backfire ini nga mga pagpanghilabot kag pagpang-garit-garit.
Ini nga statement sang Beijing ang kasunod sang ila nauna nga naratibo nga ang Estados Unidos amo ang yara sa likod sang pag-insister sang Pilipinas sang soberanya kag kinamatarong sini sa West Philippine Sea.
Sabat naman ni Manalo, ang mga ginahimo sang Pilipinas sa West Philippine Sea ang para lamang sa nasyonal nga interes kag indi parte sang anuman nga foreign agenda.
“In a way, we’re distorting the issue. It’s being cast in the light of a strategic rivalry among the big powers, when actually, the issue is really an issue of Philippine interest and how it affects the Philippines. It has no connection to any kind of strategic rivalry among the big powers, and we think it should not be viewed that way,” suno sa tiglikom.
Gindugang sini nga indi dapat paglantawon ang Pilipinas sa sini nga anggulo, bangud kun amo sini ang ila impresyon, wala gid sang mahimo nga produktibo nga diskusyon.
“If that’s unfortunately the way they view it, then certainly it won’t really lead to any productive talks. So, we really hope that we look at this as an issue which concerns Philippine interests specifically and not any other country,” pahayag pa ni Manalo.#
