Tun-an sang Department of Foreign Affairs (DFA) ang reports nga may military exercise nga ginapatigayon ang People’s Liberation Army (PLA) Navy sang China sa sulod sang exclusive economic zone (EEZ) sang Pilipinas.
Suno kay Foreign Affairs Secretary Enrique Manalo, kinahanglan anay nga mahibaluan sang ahensya kun ano gid ang katuyuan ukon ang “exact nature” sang na-report nga illegal maritime exercises.
Wala ini direkta nga nagsabat kun makaalarma ang ginahimo sang Beijing, apang ginsiling sini nga importante nga ma-manage ini kag likawan ang mga tikang nga makapasaka sang tension sa tunga sang duha ka mga pungsod.
“As we’ve always said, we want to manage it (the situation) peacefully and that if there is any incident that raises tension, that certainly is something that we would like to avoid. We say it’s really important to see how we can manage that and to avoid actions that would tend to raise tensions,” pahayag sang tiglikom.
Una na nga ginkumpirma sang Armed Forces of the Philippines (AFP) nga mas nagdamo ang nakit-an nga Chinese warships sa West Philippine Sea kag sa labing-una nga tion, na-monitor ini nga exercise sang PLA Navy sa vicinity sang Sabina Shoal halin sang Hunyo 2-4. Lakip sa drills amo ang pagpalupad kag pag-recover sa aircraft kag hovercrafts nga nagalakip sang PLA Navy ship kag duha ka Chinese Coast Guard sa vicinity.
