Ginlunsyar na ang libre nga dialysis center sa Iloilo Provincial Hospital nga ginakabig nga dako nga bulig para sa mga pasyente nga naga-antos sang sakit sa kidney.
Sa interview sang Bombo Radyo kay Dr. Alberto Cordero, chief sang Iloilo Provincial Hospital, iya ginpahayag nga bangud sa nagadamo nga kaso sang mga pasyente nga may Chronic Kidney Disease nga nagakinahanglan sang regular nga dialysis, dako gid nga bulig ang pag-abri sang dialysis center sa Pototan, Iloilo.
Nagpasalamat man si Cordero sa Iloilo Provincial Government bangud natigayon ang pagtukod sang dialysis clinic nga makabulig sa madamo nga pasyente sa nasambit nga banwa amo man sa mga kaiping sini nga kabanwahanan.
Suno pa sa iya, may ginpatuman nga scheduling system para sa mga pasyente agud maorganisa ang pagserbisyo sang dialysis center.
Katuyuan man sang programa nga mapanubo ang gasto sang mga pasyente nga nagakinahanglan sang dialysis bangud libre ini nga serbisyo nga ginahatag sang gobyerno.
