ILOILO CITY — Ginpanginwala sang beterana nga aktres nga si Maricel Soriano ang alegasyon sa ginapahayag nagalapta nga dokumento sang Philippine Drug Enforcement Agency (PDEA) nga nagatumod nga nagagamit ang aktres sang iligal nga druga.
Ini ang kadungan man sang ginpatawag nga senate hearing sang Committee on Public Order and Dangerous Drugs nga ginapamunuan ni Senator Bato dela Rosa.
Suno kay Maricel, wala siya sang ihibalo tuhoy sa amo nga dokumento sa diin, nahibaluan niya na lang ini sang ginpabasa sa iya liwat.
Gin-ako naman ni Maricel nga nga siya ang nagapanag-iya sang condominium unit sa Rizal Tower Building sa Brgy. Poblacion, Makati City nga nangin subject sang operasyon sang PDEA sang Marso 2012.
Apang suno sa actress, nabaligya na niya ini, apang indi niya matandaan kun ano nga bulan.
Naghingyo naman si Senator Dela Rosa sa aktres sang kopya sang deed of sale sang unit agud mapamatud-an nga nabaligya na ini.
Matandaan nga may naglapta nga mga dokumento nga naghalin sa PDEA sang 2012 sa diin ginapahayag nga nakaupod ni Soriano si President Ferdinand “Bongbong” Marcos Jr. nga nagagamit sang iligal nga druga sa sulod sang nasambit nga condominium unit.
Samtang sang ginpamangkot sang media si Marcos kaangot sa amo nga issue, nagkadlaw lamang ini.
