Nagsaka na sa tatlo ang numero sang Cabinet secretaries nga nagpanaog sa ila pwesto sa nauna nga tatlo ka bulan sang tuig 2025.
Ini matapos ginbaton ni President Ferdinand Marcos Jr. ang resignation sang tiglikom sang Department of Information and Communications Technology (DICT) nga si Secretary Ivan Uy.
Suno kay Palace Press Officer kag communications Undersecretary Claire Castro, may yara sang officer-in-charge nga magabulos sa posisyon tubtub nga mag-appoint liwat ang punong ehekutibo sang bag-o nga tiglikom. Wala sini gindugangan ang detalye sa rason sang pagpanaog sa pwesto kag kun ano ang sunod nga direksyon ni Uy.
Natabo ini matapos nag-resign man sanday former transportation chief Jaime Bautista kag anay communications secretary Cesar Chavez.
Ang tion ni Uy sa DICT ang napun-an sang reports sang pagpang-hack sa mga website sang government agencies kalakip na ang iya sang Kamara tubtub sa data breach sa Philippine Health Insurance Corporation (PhilHealth).
Si Uy man ang nagpanguna sa implementasyon sang SIM Card Registration Act sa tuyo nga matapna kuntani ang spam calls and texts, apang bisan may yara sang mandatory nga rehistrasyon sang SIM Cards, gin-report nga may anum ka milyon gihapon nga scam texts kag 600,000 nga scam calls sang 2024.
Ang ginhalinan sini nga ahensya amo ang “primary policy, planning, coordinating, implementing, and administrative entity” sang ehekutibo sa pagplano, pagbalay, kag pag-promote sang national information and communication technology agenda.
Isa man ka IT expert si Uy kag na-appoint ni Marcos sa posisyon sang Mayo 2022 ukon duha ka bulan antes siya pormal nga nagpungko sa pwesto bilang president sang pungsod.
Sang nagligad nga bulan, nauna na ginsiling sang Malacañang nga gina-assess ni President Marcos ang performance sang iya tanan nga Cabinet members agud mahibaluan kun may kinahanglan islan sa liderato sa kada department.
