Hugot nga ginpanginwala sang Department of Information and Communications Technology nga madinalag-on nga nasulod sang mga hackers ang pila ka websites sang gobyerno.
Ini kasunod sang report nga na-breach sang Chinese-state sponsored hackers ang mga websites sang mga ahensya halin sa Executive Department kag nakakuha sang mga sensitibo nga military data nga naangot sa West Philippine Sea.
Suno kay DICT Secretary Ivan John Uy, wala sang current data nga nakompromiso sa pihak sang pagtinguha sang pila ka grupo nga atakehon ang government websites.
Ginpaathag sang opisyal nga ang iban nga grupo ang naga- repost sang daan nga data agud paggwaon nga madinalag-on ang ila hacking attempts.
Samtang, ginsiling man ni Uy nga naka- monitor ang DICT sang mataas nga probing kag attacks ilabi na nga nagahilapit na ang midterm elections sa Mayo.
