Bukas ang Department of Information and Communications Technology (DICT) nga i-regulate ang social media platform nga TikTok amo man ang iban nga application nga posible ginagamit para sa illegal activities.
Ginpahayag ini ni DICT Undersecretary Jeffrey Dy kasunod sang hagna nga gin-file sa House of Representatives agud i-ban ang foreign adversary-controlled applications sa Pilipinas kaangay sang TikTok.
Suno kay Dy, ini nga mga applications nga posible ginagamit sa pagpang-espiya ang dapat nga i-regulate anay kag isunod lang ugaling ang pag-ban sa paggamit sini kun kinahanglanon gid.
Magluwas sa TikTok, gina-monitor man sang DICT ang messaging app nga Telegram bangud gina-alegar nga ginagamit ini sa pag-leak sang database information halin sa mga na-hack nga government websites.
Ang Facebook ang ginagamit naman para magbaligya sang mga lapsag kun sa diin may reports pa nga may one-week-old nga lapsag nga ginabaligya sa balor nga P90,000.
Matandaan nga sa Kamara, nagduso si House Deputy Majority Leader Bienvenido Abante sang Manila sang House Bill 10489 para dumilian ang app stores kag internet hosting services sa distribution, maintenance, ukon updating sa foreign adversary-controlled application. Ginrason sini nga ang parent company sang TikTok nga ByteDance ang may koneksyon sa Chinese Communist Party (CCP) kag Chinese government.
