Daku nga pagpanghangkat para sa Commission on Elections – Iloilo City ang bag-o nga paagi sa baligyaanay kag baklanay sang boto nga nahimo naman nga digital sa tunga sang pagbag-o sang teknolohiya.
Sa interview sang Bombo Radyo kay Atty. Pinky Jevini Tentativa, election officer IV sang Iloilo City Comelec, iya ginpahayag nga ginagamit na subong ang nagkalain-lain nga digital money applications sa maduging gihapon nga vote buying activities kadungan sang election season.
Suno kay Tentativa, ‘challenging’ ini indi lamang sa ila sa Comelec kundi pati sa stakeholders.
Pahayag sini, may yara sang Kontra Bigay committee nga gintukod ang national office sang poll body apang natalana pa nga pungkuan kag diskusyunan sang local offices para ma-address sang maayo ini nga iligal nga buluhaton.
Nahibaluan nga halin sa task force, ginhimo nga committee ang Kontra Bigay para nga maproteksyunan sang maayo ang mga dokumento kag ebidensya sang mga reklamo kag maresolba ang mga kaso bisan pagkatapos pa sang eleksyon.
Magabulig man ini nga committee sa law enforcement authorities para matumod ang mga akto sang vote-buying, vote-selling, kag pagpang-abuso sa state resources.
Nahibaluan nga ang vote-buying kag vote-selling ang makabig nga election offenses sa idalom sang Section 262 sang Omnibus Election Code.
