ILOILO CITY – Plano ni Iloilo City Mayor Jerry Treñas nga i-digitize ang Office of the Building Official kag ang Local Civil Registry antes matapos ang tuig 2019.
Sa interview sang Bombo kay Treñas, iya ginpahayag nga luyag niya nga mangin digital ang tanan nga transaksyon sa nasambit nga talatapan agud nga malikawan ang kurapsyon.
Suno kay Treñas, magluwas nga makalikaw sa kurapsyon, mas madasig man ang pagproseso sang mga dukomento kun digital transaction na ang ipatuman.
Ginpahayag ni Treñas nga indi lamang sa mga nasambit nga talatapan ipatuman ang digital transaction kundi lakip man sa iban pa nga opisina sa Iloilo City Hall.
Sa pagkamatuod suno sa alkalde, mismo siya ang naka-eksperyensya sang kabudlay sa pagkuha sang dukomento bangud nga mano-mano ang proseso.
Nahibalu-an nga isa ang Local Civil Registry sa ginpatutukan ni Treñas sadto bangud sa ginapahayag 180 ka peke nga kasal nga ginrehistro sa idalom sang pagpamuno ni Mr. Juncae Manikan.
