ILOILO CITY – Mangin mas mahapos kag madasig na ang transaction sa Iloilo City Hall sa masunod nga tuig.
Ini bangud kalabanan sang mga opisina ang ipaidalom sa digitization ukon records management system.
Sa interview sang Bombo Radyo kay Francis Cruz, administrative officer V sang Iloilo City Government, iya ginpahayag nga ginalantaw ni Iloilo City Mayor Jerry Treñas nga tatlo ka mga opisina ang mangin digitized sa kada quarter.
Sa idalom sang records management system, ‘one interaction‘ ang matabo suno kay Cruz bangud ini ang ginatan-aw nga pag-release sang mga dokumento sa isa lang ka pagbayad.
Malayo ini suno kay Cruz sa nagakatabo subong sa diin kinahanglan pa nga magkadto sang isa ka tawo sa kada opisina agud tapuson ang proseso sang iya transaction.
Dugang pa sang natungdan, sa subong, ang Local Civil Registry Office gid lamang ang may yara sang electroning filing system bangud diri ang pinakadamo nga transaction ilabi na sa pagkuha sang birth certificate sa tion sang enrollment.
Lauman man nga masunod nga ipadalom sa digitization ang Office of the Building Official.
