ILOILO CITY – May yara sang re-assignment sang provincial kag city director sang Department of Interior and Local Government (DILG) sa Western Visayas.
Santo sa ginpaguwa nga DILG Regional Order 2019-190 nga ginpirmahan ni Engr. Ariel Iglesia, Regional Director sang DILG-6, si Atty. Ferdinand Panes sang Iloilo City DILG ang igasaylo sa Negros Occidental, si Negros Occidental Provincial Director Carmelo Orbista ang igasaylo sa Aklan samtang si Aklan Provincial Director Roy Defiño ang igasaylo sa syudad sang Iloilo.
Ang nasambit nga re-shuffling sa assignment sang mga City kag Provincial Director sang DILG ang mangin epektibo sa Hulyo 1, kadungan sang pagpungko sang bag-o nga set sang elected officials.
Sa interview sang Bombo Radyo kay Atty. Panes, iya ginpahayag nga welcome development para sa iya ang bag-o nga assignment.
Ginpahayag ni Atty. Panes nga isa ka daku nga pagpanghangkat para sa iya nga magserbisyo sa Negros Occidental nga isa ka daku nga probinsya sa rehiyon.
Sa pagpaathag sang natungdan, normal lamang ang re-assignment sa mga government officials.
Kadungan sini, ginpromisa ni Atty. Panes nga bisan nga nagbag-o na ang administrasyon, indi magbag-o ang ginahatag nga serbisyo kag bulig sang DILG.
