ILOILO CITY – Gilayon nga magapatigayon sang validation kag evaluation ang Department of Interior and Local Government agud nga mahibalu-an kun sin-o ang compliant kag non-compliant sa Oplan Hawan.
Nahibalu-an nga magatapos na sa Setyembre 29 ang plaso nga ginhatag sang nasambit nga ahensya sang gobyerno kag ni Presidente Rodrigo Duterte agud nga makuha ang tanan nga obstruction sa dalan.
Sa interview sang Bombo Radyo kay Iloilo City Department of Interior and Local Government Officer Mr. Roy Defiño, iya ginpahayag nga santo sa memorandum nga ginpaguwa ni Sec. Eduardo Año, ginamandu-an ang tanan nga Provincial kag City Director nga magtukod sang validation team.
Suno kay Defiño, ang validation team ang pagalakipan sang mga tiglawas sang Department of Interior and Local Government, Philippine National Police, Bureau of Fire Protection kag Accredited Civil Society Organization.
Ginpahayag ni Defiño nga ang validation team sang Iloilo City kag Bacolod City nga ginakabig highly urbanized city, ang magabayluhanay sa tion sang validation kag evaluation.
Para naman sa mga probinsya, ang mga validation team ang magasentro sa tagsa ka mga banwa kag component city nga nalakip sa ila area of responsibility.
May kaangtanan diri, ang validation kag evaluation ang patigayunon sa Setyembre 30 tubtub Oktubre 19, 2019.
Sa assessment, ginpahayag sang natungdan nga may yara sang guidelines nga ginpaguwa si Sec. Año.
