ILOILO – Ginkumpirma sang Department of the Interior and Local Government (DILG) nga nabaton na ni Janiuay, Iloilo Mayor Bienvenido Margarico ang letter of recommendation tuhoy sa pagsuspende sang mga cockpit operations sa banwa sang Janiuay, Iloilo.
Ini ang kasunod sang mga impormasyon nga nabaton sang ahensya tuhoy sa ginapahayag online bulang nga natabo sa nasambit nga banwa.
Sa interview sang Bombo Radyo kay Teodora Sumagaysay, Provincial Director sang DILG Iloilo, iya ginpahayag nga kaundan sang amo nga sulat amo ang paghingyo sa alkalde nga magapaathag may kaangtanan sa presensya sang camera sa Hernani Barranco Sports Complex, sa banwa sang Janiuay, Iloilo sa diin ginhiwat ang online bulang.
Lakip man diri suno sa opisyal ang panugyan nga i-suspende ang cockpit operations.
Suno kay Sumagaysay, may tatlo ka adlaw ang alkalde agud magsabat sa iya letter of recommendation.
Nahibaluan nga base sa Department of the Interior and Local Government memorandum circular 2020-140, ang mga lugar nga yara sa idalom sang Modified General Community Quarantine (MGCQ) ang mahimo na nga maka-operate sang bulang apang kinahanglan nga masunod ang pila ka mga kondisyon.
Lakip sa mga kondisyon amo ang pag-obserba sang health protocol; wala sang live audience, wala sang online ukon telecasting kag nakadepende sa local government unit kun pahanugutan ang pag-operate sang bulang.
