Ginklaro sang Department of the Interior and Local Government (DILG) 6 ang mga klaripikasyon natuhoy sa pagpatuman sang Memorandum Circular No. 2026-006 ukon Anti-Epal Policy sa bahin sang Philippine National Police ukon PNP.
Sa interview sang Bombo Radyo kay DILG 6 Regional Director Juan Jovian Ingeniero, CESO III, iya ginpahayag nga dapat wala gid sang personal nga pangalan sang bisan sin-o nga politiko sa mga kagamitan kag pasilidad sang kapulisan pareho sang police stations, patrol cars kag iban pa nga ginagamit sa operasyon sang PNP.
Suno kay Director Ingeniero, bisan pa donasyon ini sang isa ka politiko, indi gihapon pwede ang pagbutang sang ila personal nga ngalan, litrato ukon slogan bangud ang nasambit nga mga kagamitan ginakabig nga para sa publiko kag indi personal nga representasyon sang isa ka opisyal.
Pahayag pa niya, kun may yara man sang ginapatuman nga proyekto ukon programa ang isa ka police unit, dapat makita lamang amo ang opisyal nga ngalan kag logo sang Police Regional Office 6 ukon ngalan sang police station agud mapabilin ang institutional identity sang organisasyon.
Gina-discourage naman subong sang ahensya ang pagpangayo sang sponsorship para sa mga proyekto ukon programa agud malikawan ang posibilidad sang personal nga promosyon ukon impluwensya halin sa nagasuporta.
Ginpahayag man niya nga wala ginadumilian ang mga opisyal sang kapulisan nga maghimo sang ila kaugalingon nga tagline basta wala ini naga-angot sa bisan ano nga politiko kag wala nagahatag sang personal nga promosyon.
Ginpaathag sag DILG 6 nga ang ginatugotan lamang amo ang paggamit sang opisyal nga logo sang local government unit ukon sang PNP bangud ini ang naga-representar sa institusyon kag indi sa personal nga pagkakilanlan sang isa ka opisyal.
Sa bahin naman sang pagpasiguro nga wala sang police personnel ang magalapas sa nasambit nga policy, ginasalig na sang DILG 6 ang imbestigasyon kay Police Regional Office 6 Director PBGen Josefino Ligan ang imbestigasyon amo man ang mga penalidad nga pagatubangon sang mga magabayolar.
Words by: Bombo Krylle Melliza
