Nagasugod na ang imbestigasyon sang Department of the Interior and Local Government sa kontrobersyal nga insidente kun sa diin masobra 10-minutos pa ang nakaligad antes nga nagsabat ang 911 emergency dispatcher sa nagapangayo sang ila bulig.
Suno kay DILG Sec. Jonvic Remulla, seryoso gid nila ini nga paga-imbestigaran.
May kaangtanan ini sa social media post ni Basty Askri, kun sa diin ginpakigbahin sini nga magluwas sa madugay nga pagsabat sang nasambit nga hotline, puros “wait lang” ang nangin sabat sa iya kag nakabati pa siya sang nagakinadlawanay, sa baylo sang madasig nga pagbulig sa ila bangud gina-atake na sa corazon ang iya amay.
Suno sa uploader, sya man mismo ang nag-CPR sa iya amay bangud nadugayan pa antes nga nag-abot ang ambulansya.
Sang nag-abot na ang Ambulance, wala man ini sang Automated External Defibrillator (AED) nga nangin rason agud padayunon sini ang iya CPR.
Ginpakigbahin man niya nga luyag nya isapubliko ang ila nangin eksperyensya kun ano ang kapaslawan sang healthcare system sa Pilipinas.
Nahibaluan nga nagtaliwan man ang amay sang nasambit nga uploader kasunod sang insidente.
Sa subong, napalab-ot na ni Remulla kay Emergency 911 National Office, Executive Director Francis D. Fajardo ang nasambit nga kontrobersiya.
