Ginahulat sang Department of the Interior and Local Government (DILG) ang final report sa kaso nga ginakaulamiran sang Sangguniang Kabataan (SK) Federation President sang San Miguel nga nagpangluthang sa Barangay San Jose sa amo nga banwa.
At-large sa gihapon ang suspek nga si Mikhail Khalil Tadifa, 24, residente sang Barangay 11 matapos gintiro sini ang biktima nga si Dyezrelle Malaygay, 30, residente sang Barangay San Jose.
Una na nga ginpahayag nga nagbaisay ang duha sa social media bangud wala naghangpanay sa schedule sang basketball tournament.
Sa interview sang Bombo Radyo kay DILG-Iloilo Provincial Director Teodora Sumagaysay, iya ginpahayag nga bangud sa alleged criminal offense, natuon ang kaso sa hurisdiksyon sang Philippine National Police (PNP).
Sa bahin sang DILG suno kay Sumagaysay, may napasa na nga special report sa regional kag central offices sang DILG kag ginahulat pa ang dugang nga inputs sa amo nga kaso.
Ginpaathag ni Sumagaysay nga gina-establisar man kun may kaangtanan ang amo nga insidente sa function ni Tadifa bilang isa ka SK Federated President sa banwa. Kun ma-establisar ini nga factor, amo kag magatupa ini sa hurisdiksyon sang DILG.
Samtang nga wala na-convict si Tadifa sa amo nga kaso, may temporary vacancy sa posisyon niya nga iga-fill in naman sang SK Vice Federated President.
Antes ang pagpangluthang sa San Miguel, natukiban man nga may daan na nga mga rekord si Tadifa sa San Miguel.
Ginapahayag nga lakip ini anay sa 11 nga naaresto bangud sa illegal gambling operation sa namatyan sa Barangay 11. Sang nagligad nga tuig, ginapahayag nga gintuyo man sini nga luthangon ang anay Punong Barangay sang Barangay Igtambo matapos ginsaway bangud wala nagagamit sang face mask kag wala na gasunod sa social distancing. ##
