Magahulat ang Department of the Interior and Local Government (DILG) sa final report sang Quad Committee sang House of Representatives antes mag-akto sa ginaalegar nga existence sang reward system sa Philippine National Police (PNP) sang ginpatuman ang drug war sa idalom sang Duterte administration.
Naangot ini sa ginpangbuyagyag nga may bayad nga halin sa P20,000 tubtub sa P1-million sa pulis sa kada may mapatay nga drug suspect apang nakadepende ang reward sa lebel sang suspek nga matudas.
Suno kay Interior Secretary Juanito Victor “Jonvic” Remulla, indi pa kumpleto ang mga ginpangkanta ni retired police colonel kag former Philippine Charity Sweepstakes Office (PCSO) general manager Royima Garma kag wala pa man natapos ang mga hearing sang quad comm.
Apisar sina, ginpahayag sini nga may mga tikang naman subong nga ginahimo ang pulis lakip na ang imbestigasyon sa mga “cold cases” nga nagalakip sa mga pagpamatay sa mga yara sa drug watchlist.
Lakip diri amo si retired police general Wesley Barayuga nga ginluthang-patay sang 2020 sang siya pa ang PCSO board secretary. Sa quad comm hearing man ginbuyagyag sang pulis nga si Lt. Col. Santie Mendoza nga si Garma kag police colonel Edilberto Leonardo ang nagmandu nga patyon si Barayuga.
Sa bahin naman ni PNP chief Gen. Rommel Francisco Marbil, ginkumpirma sini nga nakatukod na siya sang committee agud nga imbestigaran ang tanan nga alegasyon ni Garma kaangot sa extra-judicial killings kag sa reward system.
Nalakip sa imbestigasyon ang rebelasyon ni Garma nga gin-brief man ang anay PNP chiefs kaangot sa amo nga sistema sang hatagay sang padya.
Una naman nga nagpanawagan si Marbil sa former PNP chiefs nga magbulig kag klaruhon na sa otoridad kun ano ang ila nangin papel sa drug war sang anay Duterte administration.#
