Nakabaton ang Department of the Interior and Local Government (DILG) Regional VI sang memorandum nagikan sa ila central office nga nagamando nga imbestigahan ang infiltration sa mga ahensya sang gobyerno kag pahalinon ang mga empleyado nga may kaangtanan sa communist terrorist group.
Sa interview sang Bombo Radyo kay Atty. Cedric Jaranilla, legal officer sang DILG Region VI, iya ginpahayag nga ang nasambit nga mando sang DILG central office ang makabig nga ‘confidential’ rason nga indi nila ini madiskusyunan sa publiko.
Suno kay Jaranilla, indi pa nila masapubliko ang partikular nga mga departamento ukon organisasyon nga gina-alegar may kaangtanan sa terorista nga grupo bangud may yara man ang mga ini sang nagapadayon nga programa kag aktibidad.
Ginpahayag ni Jaranilla mapasaka lamang sila sang report kag ang ila central office na ang magapatigayon sang maid-id nga imbestigasyon.
Kun mapamatud-an suno sa natungdan nga may kaangtanan sa communist terrorist group ang isa ka ahensya ka gobyerno ukon organisasyon, posible nga kaso administratibo kag kriminal ang ipasaka sa ila.
