Nagpasaka na ang Department of the Interior and Local Government (DILG) sang kaso nga graft batok sa kontrobersyal nga alkalde sang Bamban, Tarlac nga si Alice Guo bangud sa ginaalegar nga kahilabtanan sini sa Philippine Offshore Gaming Operator (POGO) sa iya banwa.
Suno kay Interior Undersecretary Juan Victor Llamas, na-file ang kaso sa Office of the Ombudsman sang nagligad pa nga Mayo 24.
Nag-ugat ini sa pag-isyu ni Guo sang permit sa Hongsheng Gaming Technology Inc. apisar nga wala man nakumpleto sang kumpaniya ang requirements kag expired man ang lisensya sini sa Philippine Amusement and Gaming Corp. (PAGCOR).
Matandaan nga gin-raid sang otoridad ang 10 ka ektarya nga gina-operate sang Zun Yuan Technology Inc. sang Marso 13 kag nakitaan sang devices nga naangot sa POGO operations. Masobra 600 Filipinos kag foreigners ang na-rescue sang tion nga ginpatigayon ang raid.
Una man nga gin-raid ang complex sang 2023 sang gina-operate pa ini sang Hongsheng Technology Inc. nga gina-link kay Guo bangud siya ang nag-apply para sa letter of no objection para sa license to operate sang complex.
Nadiskubrehan man nga alkalde ang incorporator sang Baofu Land Development Inc. nga nagapanag-iya sang duta nga nahamtangan sang complex. Ini nga complex ang ginabug-usan sang 36 buildings, may swimming pool, kag may luxury cars.
Una na nga nagpanginwala si Guo nga may involvement sa operasyon sang POGO hub. Gin-ako sini nga nangin Baofu incorporator apang antes pa ini nga nangin alkalde siya sang 2022.
Una man nga ginpahayag ni President Ferdinand “Bongbong” Marcos Jr. nga subject sang imbestigasyon si Guo, kag ginpahayag man sini nga wala sang pulitiko sa Tarlac nga nakakilala sa amo nga alkalde.
Magluwas nga ginasuspetsahan nga may kaangtanan sa POGO, matunog man ang pangalan ni Guo bangud ginadudahan ini nga Chinese spy.
