Nagpaandam ang Department of the Interior and Local Government (DILG) kag ang Presidential Anti-Organized Crime Commission (PAOCC) nga ang kuwarta nga halin sa iligal nga aktibidad sang Philippine Offshore Gaming Operation (POGO) firms ang posible nga gamiton sa 2025 elections.
Suno kay Interior Secretary Benhur Abalos, mas ginpabaskog na sang ahensya kag sang Philippine National Police (PNP) ang kampanya batok sa POGO agud malikawan nga ma-eleher sa pwesto ang mga pulitiko nga involved sa illegal activities.
“Whether we like it or not sa totoo lang kung minsan itong mga perang illegal na ito ay ginagamit to prop up candidates. ‘Yun ang masaklap dito, all of these things could possibly affect an election,” suno kay Abalos.
Mangin ang Office of the Ombudsman kag Sangguniang Panlalawigan ang may otoridad suno sa iya nga i-suspend ang POGOs.
Sa Pampanga, matandaan nga 19 ka mga alkalde paagi sa League of Municipalities of the Philippines ang nag-isyu sang resolusyon nga nagapamatok sa operasyon sang POGO sa ila nga hurisdiksyon.
Suno kay Abalos, ang pagbusisi sa criminal aspect sang POGO cases ang ginauyatan sang Criminal Investigation and Detection Group (CIDG) samtang ang PAOCC naman ang naga-akto nga co-complainant.
Samtang, ginkumpirma naman sang PNP nga magkaangot ang mga operasyon sa ginpang-raid nga POGO hubs sa Bamban. Tarlac kag sa Porac, Pampanga.
Sa Porac, may nakit-an ang police kag PAOCC nga mga bagay nga ginagamit sa torture, gina-alegar nga Chinese military uniforms, kag pila ka devices nga ginagamit para sa pagpang-scam paagi sa text messages.
Sa Bamban naman, anum ka Chinese Pogo workers ang nadakpan kag lunsay mga pugante sa China bangud sa fraud, operating gambling dens, kag iban pa nga daku ga krimen.
Naglunsar man sang imbestigasyon ang PNP sa Central Luzon regional police director kaangot sa illegal POGOs. Suno kay PNP chief Gen. Rommel Francisco Marbil, busision kun may kahilabtanan man si Central Luzon police director Brig. Gen. Jose Hidalgo kun ngaa nagdamo ang POGO-related incidents kag wala mayo naimbestigaran.
