Ginpasalig ni Interior Secretary Jonvic Remulla nga siguruhon sini kag sang ahensya nga indi makapalagyo sa hustiya si anay Negros Oriental Rep. Arnolfo Teves Jr. apisar sang mga excuse nga iya ginahimo.
Sang Martes, Hunyo 17, sang gindala si Teves sa Philippine General Hospital kag ginpaidalom sa operasyon agud makuha ang iya appendix kasunod sang report nga nagbatyag ini sang tuman nga pagpalanakit sang tiyan.
Suno naman kay Remulla, siguruhon nila nga mabalik ini gilayon sa kun diin ini naka-detain.
“I will ensure that he will not escape justice and that he will not escape regardless of whatever excuses he may say,” pahayag sang tiglikom sang Department of the Interior and Local Government (DILG).
Hunyo 9 sang gindala si Teves sa Bureau of Jail Management and Penology (BJMP) facility sa Camp Bagong Diwa sa Taguig City. Ang BJMP isa ka attached agency sang DILG.
Nagpahayag naman ang abogado ni Teves nga si Atty. Ferdinand Topacio nga magapabilin anay ang former congressman sa ospital samtang nga naga-recover ini kasunod sang laparoscopic appendectomy.
Samtang yara sa ospital, magapa-check man ang anay kongresista sa iya pre-existing conditions kaangay sang asthma kag problema sa korason.
Nahibaluan nga si Teves ang napabalik sa Pilipinas halin sa Timor Leste kag subong nagapangatubang sang sampaw-sampaw nga mga kaso sang murder, frustrated murder, kag attempted murder lakip na ang ginaalegar pagpapatay sini kay anay Negros Oriental Gov. Roel Degamo kag siyam ka iban pa.
