Ginrekomendar sang Department of the Interior and Local Government (DILG) nga i-dismiss sa serbisyo ang 20 senior officials sang Bureau of Fire Protection (BFP) bangud sang ginaalegar nga kurapsyon.
Suno kay Interior Secretary Jonvic Remulla, masobra sa P15-billion ang ginakolekta sang BFP kada tuig bangud sang sini nga sahi sang pagpanguwarta.
Ginapreparar man ang kaso batok sa amo nga opisyal, kag natalana nga ipasaka sa masunod nga semana.
Suno kay Remulla, ang presidente lamang ang sarang nga makakakas sa BFP chief, apang naghatag na siya sang iya nga rekomendasyon, kag nalakip sa ginrekomendar nga kakason amo mismo si BFP director Jesus Fernandez.
Ginhalimbawa ni Remulla ang insidente sang Disyembre kun sa diin gin-alegar nga nagpangayo ang close aide sang fire chief sang P1.5-million kada fire truck bilang kickback.
Ginapilit man sang BFP inspectors ang business owners nga magbakal sang safety equipment halin sa ila ginpangpili nga suppliers. Nagapanglakaak ang presyo sang ila suppliers, apang nagapamahog ang BFP nga indi mag-release sang permit kun indi mag-comply ang mga tag-iya sang mga negosyo.#
(Photo: Ryan Baldemo)
