ILOILO CITY – Positibo ang feedback sang Department of Interior and Local Government tuhoy sa ginapatigayon nga Oplan Hawan sa syudad sang Iloilo.
Ini ang kasunod sang ginpatigayon nga secret inspection sa diin mismo si Department of Interior and Local Government Assistant Secretary Manuel Felix ang nakasaksi nga naghawan na ang mga dalanon sa palibot sa syudad.
Sa interview sang Bombo Radyo kay City Department of Interior and Local Government Officer Roy Defiño, iya ginpahayag nga naaktuhan mismo si Assistant Secretary Felix ang clearing operations sang oplan Hawan team sa Brgy. Magsaysay, Iloilo City.
Suno kay Defiño, kaupod ni Felix nga nagpatigayon sang secret inspection amo ang monitoring team sang nasambit nga ahensya sang gobyerno.
Samtang, ginpahayag man ni Defiño nga magapadayon ang Oplan Hawan bisan pa nga natapos na ang plaso nga ginhatag ni Presidente Rodrigo Duterte.
Suno kay Defiño, indi man mahinago nga may mga barangay pa sa syudad sang Iloilo nga may madamo sa gihapon ang obstruction.
Bangud sini, ginpahayag ni Defiño nga magapangayo siya sang listahan sang mga barangay nga may madamo sang obstruction kag iya nga ipatawag ang mga barangay officials kun nga-a wala sila nagasunod sa Oplan Hawan.
Sa subong suno kay Defiño, padayon ang Oplan Hawan kag magapadayon sa gihapon bisan nga natapos na ang Setyembre 29 nga plaso.
