ILOILO CITY – Ginpanindugan sang Department of the Interior and Local Government nga may yara sang koordinasyon may kaangtanan sa pagpapauli sang mga Locally Stranded Individuals sa Western Visayas sang damlag lang.
Sa press conference, ginpanindugan ni Department of the Interior and Local Government Region 6 Director Juan Jovian Ingeniero nga wala sila nagapabaya bilang lead agency sa pagpatigayon sang byahe.
Suno kay Ingeniero, atrasado na ang pagpahibalo sa ila sang Philippine Coast Guard Headquarters rason nga atrasado man ang pagpahibalo sa tagsa ka Local Government Unit nga may magapauli nga Locally Stranded Individual halin sa Metro Manila.
Ginpahayag ni Ingeniero nga kun tani, 2-3 ka adlaw antes ang byahe, napahibalo na ang mga Local Government Units nga may yara sang magapauli nga Locally Stranded Individual agud nga mahanda naman ang pagagamiton nga logistics.
Sa ila bahin sa Regional Inter-Agency Task Force, may yara man sila sang group chat sa Viber kun sa diin nila ginapaagi ang tanan nga impormasyon kag apisar 24 oras lang ang ginhatag nga tion, ginpahayag sang natungdan nga gilayon nila nga ginpahibalo ang tagsa ka Local Government Unit.
May kaangtanan naman sa problema sa kakulang sa salakyan nga mahimo magsugat sa returning residents, ginpahayag ni Office of Civil Defense Assistant Regional Director Aletha Nogra nga magapakig-angot sila sa iban pa nga ahensya agud nga makahulam sang salakyan.
Suno kay Nogra, indi mahinago nga ang iban nga Local Government Unit nga may problema sa logistics ilabi na kun salakyan ang pagahambalan rason nga nagakaatrasar man ang pagsugat sa mga Locally Stranded Individual halin sa pantalan ukon paluparan.
