ILOILO – Wala pa nakabaton sang official result ang Department of Interior and Local Government sa probinsya sang Iloilo nagikan sa regional office kag central office may kaangtanan sa nationwide road clearing operations.
Sa interview sang Bombo Radyo kay Department of Interior and Local Government provincial director Teodora Sumagaysay, iya ginpahayag nga may nakit-an siya nga discrepancy sa pag-rate sa mga lugar kadungan sang pagpatigayon sang pagpanghawan sa mga dalanon.
Base sa makit-an sa website sang ahensya, may 8 ka mga low compliance kag 14 ka mga high compliance nga mga banwa ang na rekord sa probinsya sang Iloilo.
Suno kay Sumagaysay, ang basehan sa pag-rate sang ahensya amo nga sa tion nga makakuha sang 70-80% ang isa ka lugar, ini ang makabig nga low compliance; 81-90% ang medium compliance kag 91-100% ang makabig nga high compliance.
Dugang pa sang natungdan, may isa ka banwa sa probinsya nga nakakuha sang 91% apang gin-rate lamang ini sang ahensya nga medium compliance.
Sa subong, nagapakig-angot na ang Department of Interior and Local Government Region 6 sa central office agud nga hibaluon kag klaruhon ang mga nakuha nga ratings sa mga kabanwahanan.
