Ginatarget sang Department of Interior and Local Government (DILG) nga mapahalugan ang quarantine status sang syudad sang Iloilo pagkatapos sang Hulyo 15.
Sa interview sang Bombo Radyo kay DILG undersecretary Epimaco Densing III, iya ginpahayag nga magadepende ang pagpahalog sang quarantine status sa pagnubo sang numero sang kaso sang COVID-19 sa syudad.
Suno kay Densing, nagakadapat nga maghugpong ang mga pumuluyo sa pagsunod sa hugot nga mga pagsulundan indi lamang sa syudad sang Iloilo kundi mangin sa probinsya agud maamat-amat nga magnubo ang kaso sang COVID-19.
Suno kay Densing, sang nagpadulong siya sa syudad, ginsapolan kaupod ang COVID-19 team sang Iloilo City Government kun paano mabalanse ang nagataas nga kaso sang virus kag mapatuman ang tanan nga health protocols.
Apisar sang sitwasyon, ginadayaw ni Densing ang mga Ilonggo bangud sa mataas nga kumpyansa sang kadam-an sa COVID-19 vaccine sa diin indi magnubo sa 250,000 ka mga indibidwal na ang nakalista nga magpabakuna.
Pahayag ni Densing, sa bulan sang Agosto, madamo nga mga bakuna ang maabot sa pungsod sa diin pat-od nga madugangan pa ang donasyon para sa syudad sang Iloilo.
Nahibaluan nga una na naghingyo ang syudad sang Iloilo sa National Inter-Agency Task Force (NIATF) nga panubuan sa General Community Quarantine (GCQ) ang Modified Enhanced Community Quarantine (MECQ) status sang syudad.
Gin-deny sang NIATF ini nga request sa diin ginpalawig pa ang MECQ status sa syudad umpisa Hulyo 1 tubtob Hulyo 15.
