Nagapati si DILG Undersecretary Jed Patrick Mabilog nga isa sa mga rason kun ngaa siya ang ginpili kag gin-appoint ni President Ferdinand Marcos Jr. bilang bag-o nga DILG Undersecretary amo ang iya eksperyensya bilang anay mayor sang syudad sang Iloilo.
Sa interview sang Bombo Radyo kay Mabilog, ginpahayag sini nga ang madamo nga mga awards nga nabaton sang syudad sang una kun sa diin siya ang nagapamuno sini ang pamatuod nga madamo ini sang ihibalo kag eksperyensya nga madala sini sa national government.
Ginpahayag sini nga nagapanguna gid sini nga adbokasiya nga dal-on para sa pungsod amo ang “good governance” kag integridad sa serbisyo publiko.
Ginpabutyag man sang anay alcalde nga tuman gid ka dako ang iya pagpasalamat kanday President Marcos kag DILG Secretary Jonvic Remulla bangud gintagaan ini sang tsansa nga makapangalagad liwat kag malimpyuhan ang iya pangalan paagi sa amo nga obligasyon.
Dugang pa ni Mabilog nga nagapasalig gid ini sang tampad nga pagserbisyo sa mga tawo bilang opisyal nga na-appoint sa public safety sang Department of Interior ang Local Government.
