ILOILO CITY- Nagpatawag sang hearing ang Department of Interior and Local Government Regional Office 6 para sa preliminary conference kag formal investigation sa kontrobersyal nga pagdeklarar sang state of calamity sa syudad sa idalom sang administrasyon sadto ni ex-Mayor Jose Espinosa III.
Ini may kaangtanan sa kaso nga ginpasaka nanday Alim kag Nava batok sa mga myembro sang Sangguniang Panlungsod nga nagboycott sa session sang Iloilo City Council sang Abril 23,2019 diin mayor nga agenda amo ang pagdeklarar sang state of calamity sa syudad bangud sa epekto sang El Niño.
Sa interview sang Bombo Radyo kay anay City Councilor Joshua Alim, iya ginpahayag nga mabug-at ang kaso administratibo nga ila ginpasaka batok sa anom ka mga opisyal nga sanday Vice Mayor Jeffrey Ganzon, Councilors Love Baronda, Ely Estante, Leila Luntao, Armand Parcon kag Jay Trenas.
Suno kay Alim,wala sang valid reason ang pag-absent sang mga myembro sang Sangguniang Panlungsod sang amo nga tion sa diin makabig ini nga iligal.
Partikular nga gintumod ni Alim amo si Konsehal Baronda nga nagakadapat kuntani indi mag-absent sa sesyon bangud siya ang nagaserbi nga committee chairman sang Social Services and Disaster Relief sa konseho.
Nahibaluan nga lakip lang sa mga nagtambong sa sesyon sang am nga tion sanday anay City Councilor Liezl Joy Zulueta-Salazar,City councilor Candice Tupas, Eduardo Peñaredondo, Plaridel Nava, Joshua Alim, R Leone Gerochi, kag Lyndon Acap.
Naka-leave naman sang amo nga tion si Councilor Mandrie Malabor.
Matandaan nga nangin kontrobersiyal ang pagdeklarar sang state of calamity bangud wala sang quorum sa city council sang gin-aprubahan ang nasambit nga deklarasyon.
Pananglitan naman nga magmadinalag-on ang kaso, ginpahayag ni Alim nga mahimo nga madismiss sa serbisyo ang nasambit nga mga opisyal.
