Wala gin-aprubahan ni Iloilo City Mayor Raisa Treñas ang gin-request sang Iloilo City Police Office (ICPO) nga signal jamming ukon anuman nga porma sang network shutdown kadungan sang highlights sang Dinagyang Festival.
Sa interview sang Bombo Radyo kay Joy Fantilaga Gorzal, spokesperson sang alcalde, iya ginpahayag nga ini nga desisyon sang alcalde ang ginhimo nga may koordinasyon sa Iloilo Festivals Foundation, Inc. (IFFI).
Pahayag sini, indi na luyag sang City Government nga masulit ang mga nagligad nga edisyon sang Dinagyang kun sa diin sang ginpatuman ang signal shutdown, indi lang syudad sang Iloilo ang naapektuhan kundi ang kaiping nga mga banwa partikular ang Leganes, Pavia, San Miguel, Santa Barbara, kag Tigbauan, amo man ang probinsya sang Guimaras.
Sang amo nga tion, naapektuhan man pati ang food delivery riders, e-commerce industries, kag mangin ang emergency response measures.
Sa baylo nga signal shutdown, naghingyo ang City Government sa Philippine National Police (PNP) nga mag-implementar sang mas hugot kag mas visible nga security measures agud nga mangin hilway sa katalagman ang mga magatambong sa kapistahan.
Nagpasalig naman ang pulis sang full force deployment lakip na ang mobilisasyon sang force multipliers.#
