ILOILO CITY – Daku ang bulig sang Dinagyang Festival agud mangin kilala ang syudad sang Iloilo.
Sa nangin mensahe ni Iloilo City Mayor Jerry Treñas kadungan sang highlight sang Dinagyang Festival 2020, iya ginpahayag nga bugal kag dungog para sa iya ang pagpatigayon sang mas ginpa level-up nga Dinagyang Festival nga nagapakita sang kultura sang mga Ilonggo.
Suno kay Treñas, ang pagpatigayon sang world-class festival ang isa ka paagi sang Iloilo City Government sa pagpasalamat kay Señor Sto. Niño.
Ginpahayag man ni Treñas nga sa masunod nga tuig, masaksihan sang tanan ang mas enggrande nga pagpatigayon sang Dinagyang Festival.
Ini ang rason suno sa alkalde kun nga-a gina-imbitar sa luwas sang pungsod ang Dinagyang tribe agud nga ipakita kun daw ano ka manggaranon kag makahulugan ang Dinagyang Festival.
Magluwas diri, ginplastar kag ginpabugal man sang natungdan ang mga kadalag-an kag pagkilala nga naangkon sang Iloilo City sang nakaligad nga tuig.
