ILOILO CITY – Nagdayaw ang mga judges kag mga spectators sa 10 ka mga tribu nga nagpasakop sa Ati-Ati tribe competition sang Dinagyang Festival 2018.
Lunsay ang mga ini nagpabutyag nga lunsay outstanding ang performance sang mga tribu kag wala sang mga ini ginpaslaw ang mga tumalambong.
Sa interview sang Bombo Radyo Iloilo, ginpahayag ni Shirley Halili Cruz, founder kag artistic director sang Halili-Cruz School of Ballet, sa 23 na niya katuig nga nagapungko bilang hurado sang Dinagyang Festival, nakita sini nga kada tuig nagataas ang standard sang mga performance sa kada tribu.
Nagbilib man ini sa Dinagyang bangud maayo ang mga performers kag pang-international na ang kalibre sang Dinagyang.
Suno naman kay Corazon Agustin, Board of Director sang Philippine Folk Dance Association, sa kadugay na sini nagaserbe nga hurado sa Dinagyang, kada tuig may nakita siya nga bag-o.
Para naman sa Grammy-winning Broadway producer nga si Jhett Tolentino, wala ginpaslaw sang Iloilo ang mga tumalambong bangud pang-golden year ang performance sang mga ini.
Dugang naman sang judge nga si Nelson Hardin, nag-enjoy siya sa performance kag maduagon nga costume sang mga tribu kag dako ang improvement sang mga tribes ilabi na sa choreography.
Nahibaluan nga ika-50 nga tubig subong sang Dinagyang Festival.
Para naman sa dumuluong nga si Vanessa Meluch sang Ohio, USA nga first time nakalantaw sang Dinagyang Fstival, nag-enjoy gid ini.
Unique suno kay Meluch ang selebrasyon kag festive ang bug-os nga siyudad.
Karon sa gab-i mahibaluan kun sin-o ang magadaog sa Ati-Ati tribe competition kag sa Kasadyahan regional contest nga ginpatigayon kahapon.